Smoothie skál

Besta sem ég fæ.

Tveir bananar, slatti af frosnum berjum (blandaður poki), slumpa af möndlumjólk og góð teskeið hnetusmjör. Og úr verður þessi ó svo góði smoothie, sem mér finnst best að borða úr skál og hægt að setja allskonar ofaná hann. Þetta er frekar stór skammtur og maður verður vel saddur eftir eina skál, en samt ekki illt í magan saddur. Þetta er ekki þungt í maga sem er mikill kostur. Gott hvenær sem er, morgunmatur, hádegismatur, millimál (þá mikið minni skammtur) og svo finnst mér hrikalega gott að fá mér svona skál fyrir zumba tíma þar sem þeir byrja korter í átta á kvöldin og vont að borða eitthvað sem er þungt í magann á þeim dögum.

Ég mæli hiklaust með þessu og svo er hægt að bæta allskonar útí og prófa sig áfram.

Njótið.

Þangað til næst.

Bústaðarfæði.

Jájá ég veit að ég er einn lélegasti bloggari í heimi. En hvað um það. Mikið búið að vera að gera hjá mér upp á síðkastið en um helgina átti ég æðislega helgi með frænku minni í bústað. Mikið prjónað, heklað, eldað, bakað og hlegið. Nauðsynleg næring fyrir huga og sál í góðum félagsskap. Ég ætlaði að deila með ykkur smá af gómsæta matnum sem við hristum framúr erminni um helgina.

Um leið og við komum á föstudeginum ákváðum við að skella í kanilsnúða með kremi til að eiga og narta í um helgina. Við hentum í deig en áttuðum okkur svo á því að ekki var til kökukefli í bústaðnum og við reyndum við að nota flöskur með misgóðum afleiðingum. Við ákváðum því að skella í kanilbollur. Gerðum bollur úr deiginu, smurðum ofan á með smjöri og settum svo kanilsykur yfir. Það kom bara ágætlega út og ég gæti alveg ímyndað mér að gera þetta aftur. Síðan skárum við þær í sundur og settum smjörkrem á milli.

Í Kvöldmatinn var hvítlauks marineruð kjúklingabringa, með smjörsteiktum sveppum, sætum kartöflum og salati. Já smjörsteiktir sveppir eru mögulega það besta sem ég veit. Klikka aldrei. Mæli með smjörsteiktum sveppum - með öllu!

Við hentum svo í amerískar pönnsur í laugardagsbrunch, að vísu bara tilbúnu flöskuna þar sem þú bætir bara við mjólk og hristir. Kom á óvart hvað þær voru góðar. Þá sérstaklega með nutella, þeyttum rjóma, jarðaberjum og mangó. Algjört lostæti.

Í kvöldmatinn vorum við svo með pasta með mexíkóostasósu og hvítlauksbrauð. Klikkar aldrei.

Í kvöldsnarl var svo súkkulaði ís með baileys sem sósu og fersk jarðaber. Ó svo gott.

Ég veit ekki með ykkur en persónulega finnst mér skylda að borða góðan mat þegar maður er í bústað, já og mikið af honum.

P.s. Ef þið eruð á leið í bústað munið þá eftir að taka með ykkur klósettpappír til öryggis. Þá lendiði ekki í því að þurfa að skeina ykkur með baby wipes. Ég tala af biturri reynslu. Baby wipes virka ekki.

Þangað til næst.

Ís í morgunmat? uu já takk.

Okei, viðurkenni að þetta er villandi fyrirsögn en þetta er svona "next best thing".

Í þetta fór einn frosinn banani, smá möndlumjólk og matskeið af hnetusmjöri, þeytt í blandara. Þá verður þetta svona þykkt og mjúkt og áferðin er næstum eins og á ís. Og svo er þetta líka alveg hrikalega gott. Svo er þetta líka svo frábært í allt, sem morgunmatur, millimál eða kvöldsnarl. Mæli klárlega með þessu. 

Er kannski ekkert það girnilegasta sem maður hefur augum litið, en bragðlaukarnir verða ekki fyrir vonbrigðum. Ég lofa.

Þangað til næst.

Søstrene Grene

Það er enginn að fara að segja mér að Søstrene Grene sé ekki besta búð á Íslandi. Þetta er algjörlega uppáhalds búðin mín og ef ég er í bænum geri ég mér iðulega ferðir í Smáralind eða Kringluna einungis til þess að komast í hana. Síðustu helgi var það einmitt málið. (ok. Stoppaði líka í nammilandi í Hagkaup, það var nú einu sinni laugardagur.) Það er ekki hægt að fara inní þessa búð og koma út með tómar hendur. Ekki hægt segi ég. Ég keypti nú allskonar vitleysu og fannst þetta allt hrikalega sniðugt og lífsnauðsynlegt. Tók upp úr pokanum áðan, ætla að leyfa því að flakka hingað inn. Þið getið dæmt um hversu lífsnauðsynlegir þessir hlutir eru.

Viðurkenni að fimm pakkar af límmiðum eru kanski heldur mikið.

Maður kemst að sjálfsögðu ekki í gegnum daginn án þess að eiga límbyssu.. eða?

Tvær krúttlegar krukkur og rör. Þarf ekki að færa rök fyrir þessu.

Skil ekki hvernig ég hef lifað hingað til án þess að eiga laufblaðs gatara.

Grænn vír. Mun koma að góðum notum. Ég lofa.

Æj. skulum ekkert ræða þessi augu. Ég er bara skotin í þeim.

Jújú ætli listamaðurinn í mér fari ekki að brjóta sér leið út í bráð.

Maður málar ekki striga án málningar og pensla. 

Labba aldrei út án þess að kaupa allavega tvær dokkur af bómullargarninu.

Já krakkar mínir. Lífsnauðsynlegir hlutir segi ég ykkur.

Pinterest og DIY hefur kanski haft einhver áhrif á þessi búðaferð. Sjáum til hvort þetta verði notað eitthvað í bráð. Kanski á næsta ári bara. Æj þetta myglar allavega ekki og eyðileggst.

Þangað til næst.

Krosssaums gaman

Þar sem ég er algjör handavinnu lúði og finnst fátt skemmtilegra heldur en að eyða deginum með prjónið, heklið eða nálina við hönd fannst mér kominn tími á eitt handavinnu tengt blogg.  Ég er alltaf með margt í gangi í einu og á erfitt með að klára verkefni og fæ fljótt leið á verkefnunum sem ég er að gera vegna þess að ég er alltaf að fá fleiri og fleiri hugmyndir af því sem ég gæti gert.

Ég hafði ekki gert neinn útsaum síðan ég hætti í húsó í vor og fannst kominn tími á smá dundur. Ég missti mig á pinterest að sjálfsögðu og er komin með svona 10 hluti sem mig langar að gera en byrjaði á að gera eina krosssaums hauskúpu. Prentaði bara út mynd af hauskúpu og teiknaði svo upp á rúðustrikað blað svona svo hún væri nokkurn veginn eins, síðan gerði ég allskyns mynstur inní í 4 litum. Lengstan tíma tók að teikna þetta allt upp og reyna að fá það til að passa, þolinmæðin stundum alveg á þrotum. En það hafðist, tók ekki nema einn dag og svo keypti ég þennan myndaramma í IKEA. Að vísu ekki áfallalaust þar sem ég braut auðvitað þann sem ég tók fyrst. Á reyndar eftir að strauja myndina en hafði ekki alveg þolinmæði í það í gær. Það gerist einn daginn. Eða ekki. Ég er alveg ágætlega löt með svona lagað stundum.

Ég fer að taka mig á í þessum bloggum. Ég lofa. Eða ekki.

Þangað til næst.

Sunnudagskakan

Á miðvikudaginn fórum við mamma uppí bústað í smá kósý heit. Ég þurfti að vísu að fara heim daginn eftir til að mæta í vinnu en pabbi tók minn stað. Þegar maður fer í bústað finnst mér skylda að taka eitthvað heimabakað með. Þetta er uppskrift sem við gerðum þegar ég var í húsó og við kölluðum alltaf “góða kakan” svo að ég hef ákveðið að halda því nafni bara.

Súkkulaðiterta

125 g smjörlíki

200 g sykur

2 egg

255 g hveiti

3 msk kakó

1 tsk matarsódi

1 tsk lyftiduft

½ tsk salt

1 tsk vanilludropar

1 ¼ dl mjólk

Aðferð

Hrærið smjörlíki og sykur saman létt og ljóst.

Hrærið egg, eitt í einu saman við.

Sigtið þurrefnin út í, blandið vökva saman við og hrærið lítið.

Bakið á neðstu rim í ofninum við 180°C í 20 - 30 mín.

Smjörkrem

Smjörlíki

Flórsykur

1 egg

Smjörkrem er mikið smekksatriði og misjafnt hvernig fólk vill hafa það, það er fínt að dassa bara smjörlíki og flórsykri og svo bara smakka til hvernig þér finnst best. Að vísu var ekki til smjörlíki þegar ég gerði þetta þannig ég notaðist við smjör, sem að mínu mati var eiginlega betra, þrátt fyrir að kremið væri heldur gult á lit.

Vona að þið njótið, þetta er alveg hrikalega góð kaka!

Þangað til næst.